(1930-1982¿) Cantares valdesanos

link

Medréi ya fíxeme moza                 1
en el pueblu de Sanfliz
ya agora, desde Lluarca,
en recuerdu falo así.
 
Los páxaros na perar                    2
acabanon conas peras,
nu alcontréi más que cazuetos
cuandu quixe recoyelas.
 
You nun séi por quéi Xuanón        3
vei tantas veces al horriu,
si yá nun guardo allí'l vinu
nin tansiquiera'l mendongu.
 
Porque-y escondí'l tabacu             4
enfocicóuse Xuacón
ya enfocicáu inda sigue
debaixo del cabanón.
 
Del picu de la figar                        5
caeu'l fíu de Xuaca,
ya tovo suerte, que'l nenu
sólo rompéu una pata.
Nas tornabodas del pueblu            6
yara you'l que más beillaba,
cuandu la mía nun pude
porque nun tenía gana.
 
A los gochos de ca Pacho             7
tiénenlos amelindraos,
nun cuemen más que tarriellos
ya si tán recién pañaos
 
Quixe facer, ya nun fixe                 8
lo que facer debería,
agora yá taba feito
si lo fixera aquel día
 
El pollín de la vecina                      9
ta ganando la cebada,
nun ya extraño que la gane
si lo mesmo fai l'ama.
 
Sabes que fai muitu tiempu            10
que naide morre en tou casa.
Siéntolo, que nu veloriu
ya donde miyor se pasa.
 
Yara nuesu'l pitu roxu                   11
que comienon en ca'l cura,
foi un vienres de Cuaresma
pero allí tenían bula.
 
El perru de ca Manulo                   12
pasa los días lladrando
lo que nun séi ya a quién lladra
si a los gatos o al melandru.
 
Porque tien dineiru abondu            13
ya van a nombralu alcalde,
ta faciendo una panera
con más pegollos que naide.
 
A manu pesca las truitas                14
Pin, el fíu de Macariu,
ya después vei a vendéilas
al cura ya al boticariu.
 
Xunto al llar, enun charolu,            15
siéntase'l pobre Marcelu,
mientras tanto nel escanu
fanlo la muyer ya'l nenu.
 
Debaixu la sou ventana                  16
puxenon un gran carbayu,
quién foi sabrase a la nueite,
cuandu lu vean gabialu.
 
Por nu aguantar el sermón             17
que taba dando aquel flaire
gipióu de la ilesia Antón
sin que lu viéramos naide.
 
Pa xugar a balincase                      18
truxo una cuerda Pepón
ya colgóula d'una viga
debaixu del cabanón.
 
Rindes abondu esfoyando             19
más valía nun rindieras,
que rabucas las panoyas
ya nu hai por ónde coyelas.
 
Las cereizas tán maduras,              20
páñame unas mandiladas
ya ten cuidáu nun caete
que podes estrapayalas.
 
Debiste contar con ella                  21
antes de vender el xatu,
yá sabes que las muyeres
fan ya desfan cualquier tratu.
 
Si vas a segar ballicu                     22
ya tras una borricada
podes ir después pal chigre
que nun vou decite nada.
 
Cada vez que das la vuelta            23
ruxe la fueya'l xargón
ya ruxe toda la nueite
porque nun paras, Xuacón.
 
Antes, la xente a los curas             24
guardába-ys un gran respetu,
agora, sin la sotana,
aquí Pachu, aquí Nicetu.
 
Mientras tengas el mendongu         25
afumándose nel llar
nun volvo vete, qu'anueite
penséi que m'iba afogar.
 
Debaixo'l xargón de fueya             26
guarda los cuartos Marica,
naide sabrá hasta que morra
que la probe yara rica.
 
Guardaba los cuartos Pepa           27
nu bolsu la faltriquera
ya comu tenía un furacu
nunca pudo vela  llena.
 
Ena capilla Sanfliz,                        28
chenu l'altar de claveres,
caséime you, allí delantre
de la Virxe de las Nieves.
 
Venía'l nenu chorando                  29
porque se mancóu na manu.
¡Nun chores!, dixo la buela,
que vou ponete un encanu.
 
Quixe facer una saya                     30
ya mandéi traer bon pañu,
nunca al home-y lo mandara
que me truxo un zarabayu.
 
Peme que lo fai adrede                  31
la vaca de Manulón,
que siempre caga una bulla
delantre del miou portón.
 
Desde qu'echóu una moza            32
con el criáu nu hai quien pueda,
mandéilu a segar ballicu
ya foi segame la ceba.
 
Chamóulu pa da-y limosna            33
ya púxolu a trabayar,
lluegu con cuatru pirronas
despachóulu ensin cenar.
Echóume duas garfelladas             34
de potaxe na escudiella,
pero'l compangu deixóulu
pa lluegu comelu ella.
 
Respeta a tou padre, nenu,            35
dixo la madre al sou fíu,
mal vou poder respetalu
si ta borrachu perdíu.
 
Engafóuseme una dida                   36
por un pinchu que clavéi,
si foi d'artu o foi d'arizu
eso sí que nun lo séi.
 
lladróu'l perru a la nueite               37
y a quien lladróu bien lo sei
que quixo entrar pola puorta
pero you nun lu deixéi.
 
La oveya que me vendiste             38
Dios te la pague, Pascual,
que paga miyor que you
que nun tengo niun rial.
 
Pensóu que yara un gran mozu      39
Manulín, el de Colasa,
ya cuandu foi a tallase
mandánonlu pa sou casa.
 
Una vaqueira de llagu                    40
guarda los cuartos nel sen,
ya comu ta rica abondu
nun pode cono que tien.
 
Sanóunos los nuesos gochos         41
Sant'Antón de Concilleiru,
razón tienen los que dicen
que ya un santu milagreiru.
 
Baixa al güertu, Manolín,               42
  a coyer peras maduras,
ya vei llevá-ylas al cura
pa que nun cobre las bulas.
 
Yá te dixe l'outru día                     43
que nun fixiste bon tratu,
la vaca salíu turriona
ya espernequebráu'l xatu.
 
Anueite fixe torreixas                     44
ya nun veniste a comelas,
eso perdiste, miou nenu,
porque nun volvo facelas.
 
Debaixu d'aquel nocéu                  45
de cucas te fartucaste,
mientras tú cueme que cueme
you venga parte que parte.
 
Si yá tan melaos los figos               46
cueye una escudiella, Xuan,
d'ellos la mitá pa'l cura
ya la outra pa'l sacristán.
 
Anantes bien que querías               47
ya agora dices que non,
yara pequenu'l antoxu
cuandu yá se te pasóu.
 
Puxiste tantu cuidáu                       48
en nu emporcate de llama
que fuste a poner la pía
nu mediu d'una poutada.
 
Anueite llevóu-y l'aire,                  49
a Xuacón, el balagar
ya decía, polo baixo,
acabóuse l'esmesar.
 
Xugando con unos nenos              50
manquéime nuna rodía
ya agora llevo esti encanu
que me puxo tía María.